18. August 1336

Spruchbrief Peter's des Freisinger, Hofmeisters des Stiftes über einen Weingarten zu Klosterneuburg

Ich Peter der Vreysinger, zu den zeiten Hofmaister vnd Perchmaister des gotshaws ze newnburk vergich — Daz fu\er mich kom fraw Margret vnd Perchtold ir wirt des Statschreiber Svn von Wienne vnd klagten gegen aim weingarten, des fvnf Rahen sint, leit im Geswent zunachst Gerbotn des alten Slussler bruder weingarten vnd haizzet der Dekcher, den fraw Margret vnd ir evarr wirt Rueger der Tuechler, dem got genad, gekauft solten haben mit seim bruder kunratem dem tuechler von Newnburgk, vnd hieten Im den enpholichen auf sein trowe vnd klagten das so lange, vncz in pedenthalben ein gemezzner tag gegeben wardt In das etaiding zu flust vnd
zu gewinne. Do kom kunrad in das etaiding, vnd verantwurt denselben weingarten mit vorsprechen, vnd iach, derselb weingarten wer sein, vnd hiet in gekaufft vmb sein ledigs guet, vnd hiet in gehabt vnverprochen in nucze vnd in rechter Perkrechts gewer mer denn recht ta\eg, vnd pat fragen, was recht wer. Do ward ertailt in dem selbigen etaiding mocht chunrad das pringen mit den erbern vmbesezzen vnd mit den perkgenozzen das er denselbigen weingarten gekauft hiet vmb sein ledigs gut vnd fraw Margret vnd ir evarr wirt Rueger der tuechler chain tail an demselben weingarten nicht hieten, er svlt sein geniessen an seim recht. Das pracht kunrat der tuechler
mit den erbern vmbesezzen vnd mit den perkgenozzen, Als im ertailt was mit frag vnd mit vrtail, als er zu recht solt. Darnach ward Chunra\od dem tuechler vnd seiner hausfrawen frawen kathrein vnd ir paider erben rube ertailt von frawen Margreten vnd irem wirt Perchtolden vnd von ir paider erben vmb denselben weingarten. Is mag vnd soll auch Chunrad der tuechler vnd sein hausfrowe frow Kathrein vnd ir paider erben furbaz mit demselben weingarten allen irn frumb schaffen — Des gib ich — disen brieff — versigelten mit meim Insigel. Des sind zeug die erbern Ritter, her Seybot von Paczmanstorf, zu den zeiten Statrichter hie zu Newnburgk, her Gervnch der Chol, her Diettreich der Schifer, her hauch der floyt, her Christan der Sluzzla\er, her Syman der Richter, vnd die Erbern purger, Chunrad [259] der smuchenphenning, leopolt von awe, wernhart vnder den lawben, vnd ernst der huter, Peter vnd Constantin von Sand Mertein, Dietreich der Retzer, Chunrad der schifer, perchtold vnd fridreich der chlain vnd ander erber Lewt genuege — die pei dem recht vnd pei den taidingen gewesen sind. Der brief ist geben — drewzehenhundert Jar‚ darnach in dem Sechs vnd dreizzigkistem Jare des Suntags nach vnser lieben frawn tag zu der Schiedunge.